Auteur-Archiv: Mylène Schrenger

Getrei dem Motto “Mir schaffe 36 Stonne fir Iech“, stoung de Weekend vum 30. September an 1. Oktober nees eis Landjugend-Power-Aktioun um Programm. Queesch uechtert d’Land waren eis siwe regional Landjugendgruppe fir eng 13. Kéier an deene verschiddenste Gemengen ënnerwee an hunn ënnerschiddlech Projeten duerchgezunn. Ugefaangen hunn se simultan samschdes moies um 8 Auer. Zäit fir hir Projeten haten se 36 Stonnen, deemno war ee Sonndeg um 20 Auer Schluss.

Sou hunn dëst Joer d’Landjugend Clärref ee Gaardenhaische fir d’Maison Relais zu Wëntger gebaut, d’Landjugend Furen huet zu Pëtschent eng Grillplaz ugeluecht an d’Landjugend Maacher den Dach vum Chalet um Scheedgchen erneiert.

Net ontäteg waren déi aner Landjugenden! Déi Dikkricher hunn d’Gelänner vum Chalet um Grondwee renovéiert, d’Landjugend Süden huet nei Bänken an der Gemeng Mamer opgeriicht an d’Landjugend Zenter huet de Schoulkanner vu Lëntgen eng Matschkischen opgeriicht. Zu Bauschelt huet d’Landjugend Uewersauer sech ëm d’Verschéinerung vun der Plaz ronderëm d’Denkmal vun der 35. Infanterie gekëmmert.

D’Landjugend a Jongbauere soen de Verantwortlechen aus de jeeweilege Gemengen ee grousse Merci, fir déi gutt Viraarbecht an d’Deelhuelen un der Landjugend-Power-Aktioun 2023. Och ee grousse Merci un eis Membere fir hiren onermiddlechen Asaz!

E Sonndeg,den 20. November 2022 huet d’Lëtzebuerger Landjugend a Jongbaueren a.s.b.l. (LLJ) op hiren traditionelle Jongbauerendag an de Lycée Technique Agricole zu Gilsdref invitéiert.

Fir eng zweete Kéier gouf hei zu Gilsdref am Festsall de wuel wichtegsten Owend vun der LLJ a.s.b.l. präsentéiert, deen och nees live op de Soziale Medien iwwerdroe ginn ass, fir déi Leit déi de Wee an de Lycée Technique Agricole net konnten op sech huelen.

Den Här Äerzbëschof, S. Em., Jean-Claude Card. Hollerich, huet sengersäits alleguerten d’Nolauschterer begréisst a säi Grousswuert u d’Leit geriicht.

Uschléissend hunn d’Marthe Bourg an de Charel Welbes, Membere vum Aarbechtsgrupp „Agrarpolitik“, déi agrarpolitesch Stellungnam virgedroen, wou si d’Gedanken an d’Doleancë vun eise Memberen ugeschwat hunn. Dës Punkte sinn an der Table ronde duerno nees opgegraff an diskutéiert gi vun eisen Invitéen.

Zum Schluss huet de Landwirtschaftsminister Claude Haagen d’Wuert ergraff a puer weider Informatiounen an Erklärunge ginn zu den ugeschwaten Themen.

Invitatiounskaart Jongbauerendag 2022

Stellungnam 2022

Pressetext Jongbauerendag 2022

E Sonndeg, den 20. November 2022invitéiert d’Lëtzebuerger Landjugend a Jongbaueren a.s.b.l. (LLJ) op hiren traditionelle Jongbauerendag zu Gilsdref an der Ackerbauschoul.

An der grousser Aula gëtt hei fir eng zweete Kéier de wuel wichtegsten Owend vun der LLJ a.s.b.l. präsentéiert.

Um Programm stinn:

1. Begréissung duerch den LLJ-Nationalpresident Luc Emering

2. Grousswuert vum Här Äerzbëschof, S. Em. Jean-Claude Card. Hollerich

3. Panneldiskussioun mam Här Treinen, Här Wagner, Här Reding, Madamm Bourg an Här Emering zum Thema: “Landwirtschaft, Energie an Ëmwelt – Chancen a Géigesäz”, ënnert der Moderatioun vun der Madamm Goerens

4. Agrarpolitesch Stellungnam, virgedroe vum Marthe BOURG a Charles WELBES, Membere vum LLJ-Aarbechtsgrupp Agrarpolitik am Dialog mam Här Claude HAAGEN, Minister fir Landwirtschaft, Wäibau an Entwécklung vum ländleche Raum

5. Fazit a Schlusswuert duerch den LLJ-Nationalpresident Luc EMERING

duerno invitéiere mir Iech op en Éierewäin.