Kategorie-Archiv: LLJ – Fro de Bauer

Bedéngt duerch d‘COVID-19-Pandemie kann déi traditionell Foire Agricole Ettelbruck (FAE) dëst Joer net – wéi gewinnt – organiséiert ginn. Déi Verantwortlech hunn sech dofir ausgeschwat, fir se an digitaler Form unzebidden.

Si leeft deemno den 3. a 4. Juli 2020 iwwer d’Websäit vun der FAE; dat ënner www.fae.lu. Fir déi Interesséiert bidd sech do d’Méiglechkeet, sech duerch d‘Websäit ze klicken oder de Livestream mat Chatfunktioun vun 10:00 – 19:00 Auer ze suivéieren.

Digital Foire Agricole fir Kanner a Jugendlech

Och d’Kanner an déi Jugendlech solle bei dëser 1. digitaler FAE net ze kuerz kommen. An Zesummenaarbecht mat der Lëtzebuerger Landjugend a Jongbaueren (LLJ) an der Aktioun Fro de Bauer (LLJ) proposéieren déi Verantwortlech vun der FAE e spezielle Programm fir déi Kleng an déi Jonk.

Programm:

• Ënner fae.lu sinn all d’Elementer (z.B. Videoen), déi vun den Exposante fir d’Kanner an déi Jugendlech ugebuede ginn, speziell markéiert.
• Um Site kënnt Dir Iech virtuell duerch d‘Landwirtschaft klicken: B. 3D- Visitte mat Erklärungen aus dem Mëllech- a Schwäistall, de Kéi op der Weed, d’Geméisfeld, …
• Freides, den 3. Juli 2020 ass vun 10h15 – 11h45 Auer ee speziellen animéierte Programm fir d‘Schoulklassen am Livestream virgesinn:

• • Erklärungen zur Lëtzebuerger Landwirtschaft mat Hëllef vun den 3D- Rondgäng a Videoen
  • E Gewënnspill mat engem adaptéierte Froebou fir all Cyclë mat engem flotte Gewënn. D’Äntwerten op d‘Froe fannt Dir um uewegenannte Site. D’Gewënnspill leeft bis freides, den 10. Juli 2020!

All Detailer zu dësem Programm fannt Dir ënner https://digital.fae.lu/kids/ (Wichteg: Dëse Link gëtt eréicht den 3. Juli 2020 aktivéiert). Dir braucht Iech net unzemellen; klickt einfach eran 🙂

Wann aus enger Iddi beim Patt eng flott Initiativ gëtt

Ech erënnere mech nach gutt drun, wéi mir beim Patt souzen a gesot hunn, et misst een eppes maachen. Dat heescht, eppes ënnerhuelen, fir de Bauer aus senger defensiver Haltung – géintiwwer deem ëmmer méi kritesche Konsument – an d’Offensiv ze goen:

1. Fir de Leit emol erëm d’Fakten aus der Landwirtschaft méi nozebréngen, amplaz se gleewen ze loossen, déi Reklammen op der Tëlee géifen d’Realitéit erëmspigelen,
2. fir de Konsumenten erëm ze weisen, wou a wéi hir Liewensmëttel entstinn a wéi dës Produktiounen eis Kulturlandschaft prägen.

Nom Start vum 27. September 2016, kann ee soen, dat ass äis gegléckt!

Eis Panneau-Aktioun, zwecks Sensibiliséierung, déi schonn 2 x während 2 Méint uechter d’Land ze gesi war, ass gutt bei de Leit ukomm. Dës Panneaue koumen och ëmmer erëm bei aneren Aktivitéiten zum Asaz. Donieft hu mir Bäiträg iwwert a ronderëm d’Landwirtschaft op eiser Facebooksäit, wéi och um Internetsite www.fro-de-bauer.lu gedeelt. Dës Bäiträg hu bis zu 20 000 Leit erreecht. Weider liesen →